VILOYAT QURILISH VA UY-JOY KOMMUNAL XO‘JALIGI BOSH BOSHQARMASIDA BAYRAM TADBIRI BO‘LIB O‘TDI.
Davlatimiz rahbarining 2017-yil 7-avgustdagi "O‘zbekiston Respublikasi qurilish sohasi xodimlari kunini nishonlash to‘g‘risida"gi farmoniga asosan har yili avgust oyining ikkinchi yakshanbasi “Qurilish sohasi xodimlari kuni” sifatida keng nishonlanadi.
Shu munosabat bilan viloyat Qurilish va uy-joy kommunal xo‘jaligi bosh boshqarmasida bayram tadbiri bo‘lib o‘tdi. Tadbirda soha vakillari, me’morlar, loyihachilar hamda bunyodkorlik ishlarida faol ishtirok etayotgan fidoyi xodimlar ishtirok etishdi.
Bosh boshqarma boshlig‘i Bahodir Negmatov yig‘ilganlarni bayram bilan tabriklab, so‘nggi yillarda viloyatimiz qiyofasini butunlay yangilash, shahar va qishloqlarni obod qilish, zamonaviy bino va inshootlar barpo etishda soha xodimlarining ulkan hissasini alohida e’tirof etdi.
Tadbir davomida qurilish sohasida matonat va fidoyilik ko‘rsatib mehnat qilib kelayotgan bir guruh soha vakillariga viloyat Qurilish va uy-joy kommunal xo‘jaligi bosh boshqarmasining maxsus faxriy yorlig’i va esdalik sovg’alari topshirildi. Ular so‘zga chiqib, ko‘rsatilayotgan e’tibor va rag‘bat uchun minnatdorlik bildirib, kelgusida ham yurtimiz ravnaqi uchun fidokorona xizmat qilishga tayyor ekanliklarini ta’kidladilar.
